امتياز قاضي

امتياز قاضي: مشھور ادب نواز ۽ علم دوست آفيسر قاضي امتياز ولد قاضي سچيڏنو (ڊپٽي ڪمشنر)، 2 جنوري 1953ع تي جيڪب آباد ۾ ڄائو. سندس تعلق خيرپور ميرس جي ”هوت“ بلوچ خاندان سان آهي. ٽالپرن جي دؤر ۾، سندس وڏن کي ”فتويٰ“ ۽ ”قضا“ جي خدمت سبب ”قاضيءَ“ جو لقب مليو. گورنمينٽ هاءِ اسڪول حيدرآباد مان مئٽرڪ ۽ گورنمينٽ ڪاليج حيدرآباد مان انٽر جو امتحان پاس ڪرڻ کان پوءِ گرئجوئيشن’سينٽ پئٽرڪ‘ ڪاليج ڪراچيءَ مان ڪيائين. 1975ع ۾ سنڌ يونيورسٽيءَ مان پوليٽيڪل سائنس ۾ ايم. اي ڪيائين. اتي ئي ٻن سالن کان مٿي انٽرنئشنل رليشنس ڊپارٽمينٽ ۾ ليڪچررشپ دوران سي. ايس. ايس جو امتحان نمايان پوزيشن ۾ پاس ڪيائين. 1980ع ڌاري اسسٽنٽ ڪمشنر هالا مقرر ٿيو ۽ بعد ۾ لاڙڪاڻي، جيڪب آباد، لس ٻيلي ۽ ڪراچي اِيسٽ ۾ ڊپٽي ڪمشنر رهيو. ڪجهه عرصو واشنگٽن ۾ پاڪستاني سفارتخاني ۾ زراعت ۽ خوراڪ جو قانصلر به رهيو. اهڙيءَ طرح ڪراچي ۽ ڪوئيٽا ۾ مختلف اعليٰ انتظامي عھدن تي رهڻ کان پوءِ 1996ع ۾ ميرپورخاص ڊويزن جو ڪمشنر مقرر ٿيو. نومبر 1999ع کان مئي 2001ع تائين حيدرآباد ڊويزن جو ڪمشنر رهيو ۽ پوءِ خيرپور ميرس جو D.C.O مقرر ڪيو ويو. ان کان سواءِ صوبائي سيڪريٽري آبپاشي ۽ انڊسٽريز ۽ بعد ۾ وفاقي وزارت داخلا ۾ ائڊيشنل سيڪريٽري ۽ ايڊيوڪيشن، پاڻي ۽ بجلي ۽ محتسب وزارت جو وفاقي سيڪريٽري ٿي رهيو آهي. رٽائرمينٽ کان پوءِ فيڊرل پبلڪ سروس ڪميشن ۾ ميمبر جي حيثيت سان خدمتون انجام ڏنائين. 1967ع کان ”خيام“ تخلص سان شاعري به ڪيائين ۽ علمي ادبي سرگرمين جي سرپرستيءَ ۾ هميشه متحرڪ رهيو..

داخلا ۾ استعمال ٿيل تاريخون

1953.01.02  عيسوي

امتياز قاضي ، 2 جنوري 1953ع تي ، جيڪب آباد ۾ ڄائو

شخصيتون - ڀاڱي جون ٻِيون داخلائون